Meli mbili za kivita za Iran zimewasili katika mlango bahari wa Bab el-Mandab , ambapo ni njia muhimu ya maji baina ya Yemen na Djibouti.
Katika ishara nyingine inayoleta wasi wasi baina ya nchi mahasimu katika eneo la ghuba Iran na Saudi Arabia , afisa wa ubalozi wa Saudi Arabia anayehusika na masuala ya kijeshi ametakiwa kufika katika wizara ya mambo ya kigeni mjini Tehran kusikiliza malalamiko makali kuhusiana na hatua za kijeshi za Saudi Arabia ambazo zimezuia ndege ya misaada kutoka Iran kutua mjini Sanaa.
Mkuu wa jeshi la majini la Iran admirali Habibollah Sayari amenukuliwa na shirika la habari la Iran IRNA akisema meli hizo ziko katika ghuba ya Aden kwa mujibu wa sheria za kimataifa kuhakikisha usalama wa meli za kibiashara za nchi hiyo dhidi ya kitisho cha uharamia.
